Senin, 30 Agustus 2010

Penesan

"Oiii!!!", Ilham langsung bae ngejuti adeknyo yang caknyo khusuk nian nonton teve, lepas mandi dan sholat Zuhur. "Aiidaah, kakak ni!!! buat tekejut bae!! lagi seru naah...", uji Nurul tapi matonyo dak lepas dari acara teve yang lagi ditontonnyo. "Jadilah dek nonton sinetron terus!! lemaklah kau ngaji apo tulung Emek di dapur nah", Ilham sok nasehati padahal dalem atinyo dio nak ngerebut remote teve yang dak lepas-lepas dari tangan Nurul.

"Aidaaah!! kakak ni.. sano lah dukin!!! kakak be yang ngaji duluan, yang tuo nyontohke dulu tuk yang mudo!!, Nurul la mulai dak sabaran jingok kakaknyo renyeng nian. "wuaah, hahaha... pacak nian kau niiii!!! Ilham geregetan tapi ketawo-tawo jingok gawe adeknyo. "Yo lah... jangan marah, la jahat tambah jahat gek!! hahahahaha", Ilham langsung ambek langkah seribu ke pintu jabo dibarengi babetan bantal dari adeknyo. Nurul lah dak ngibak'i lagi kakaknyo yang jahel bin bahel tuh. Dio langsung nikmati lagi tontonannyo.

Minggu, 29 Agustus 2010

Molor itu Ibadah ?

Astarghfirullah, Ilhaaaaaam!!!!!!! suaro emek lebih-lebih cak toa mesjid waktu jingok Ilham yang maseh be molor. "Payo bangun nak...., matoari la tinggi, denget lagi la azan Zuhur pulok", kato emek sambel bukak jendelo kamar Ilham.

"Kagek Meek..., kan uji wong tuo tuh molor kan ibadah kalo bulan puaso neh", uji Ilham malah sambil narik kemul, nutupi rai nyo yang keno sinar matohari yang masuk lewat jendelo. "Cacam nak.. la bener pulok uji kau", emek mesem-mesem denger jawaban anak bujangnyo itu. Emek langsung ambek posisi duduk di ranjang ilham, sambil ngelus-ngelus rambut anaknyo itu. " Payo nak, bukak mato tuh dikit, dengeri emek dulu ye". Duh, Ilham agak semon dibuat cak budak kecik oleh Emek, langsung be Ilham bangun dan duduk di samping Emek. "Iyo mek, Ilham denger sekarang", uji Ilham sambel bukak kupingnyo besak-besak nak nyimak apo yang bakal disampe'in Emek.

"Nak, bener uji kau tadi, molor itu ibadah, tapi maksud ibadahnyo tuh cak ini ceritonyo, denger ye... Dijaman Nabi dulu, para sahabat kalo di bulan Ramadhon itu galo-galonyo belomba-lomba berbuat baek, sampe-sampe seluruh waktunyo digunoke untuk ibadah. Siang-malam gawe sahabat tuh beribadah sampe-sampe dak setedukan. Nabi prihatin, mangkonyo nabi suruh para sahabat untuk molor, karena molor itu ibadah yang uji wong tuh la jadi haknyo tubuh. Men sahabat terus-terusan beribadah dak setidukan, otomatis mereka sudah menzolimi tubuh". Ngerti dak nak? tanyo emek ke anak bujangnyo yang melongok denger cerito Emeknyo.

"eeh.. iyo mek, Ilham ngerti, Ilham mandi dukin Mek, la malu pulok Ilham teduk kelamoan bukannyo ibadah", uji Ilham sambil mesem-mesem, dan langsung meloncat dari ranjang ke kamar mandi. Emek balek lagi mesem-mesem jingok gawe anak bujangnyo, sambil ngelepet kemul.